كداب
عمري ما قولت على نفسي ملاك
أو نجم عالي في أفلاك
دايما بتكلم بصراحة
بس صراحتي يا قلبي هلاك
قالوا زمان الصدق نجاه
خلي الصدق صراط وحياه
صدقت وزرعت الصدق
وحصدت من الصدق أذاه
ليه مش عايز اتعلم
اغش اتذوق أتجمل
طول الوقت اقول الصدق
وأخد على راسي وأتحمل
الابيض والاسود الواني
والدنيا ماليها الالوان
حبيس الوحدة واحزاني
وسعيد في الدنيا الثعبان
لازم ابقى انا فنان
والعب بالكلمة وباللون
فاضي وخاوي جوايا
ونافخ نفسي كبالون
افتح للكذب الباب
الناس بتحب الكداب
غش ونافق واتجمل
حتتحوط باصحاب واحباب
الكل حيطلب ودك
ما دنيتنا دي دنيا مظاهر
الغني الناس بتحبه
ولو خيره عالناس مش ظاهر
لكن في الاخر والظاهر
اوعى تصدق دا برضه كلام
حفضل طول عمري مش ظاهر
وحاكدب بس أنا في الاحلام
يحيى حسين 30 أغسطس 2020
ليست هناك تعليقات:
إرسال تعليق