زمن فات بقلم احمد شاهين
ف صورنا الأبيض والإسود
أشياء بتبان
مختلفه تماما عن صوره
بكل الألوان
بنشوف البركه والطيبه
وفرحه قريبه
ووشوش تتوضى
وأيادى بتدعى الرحمن
ف صورنا الأبيض والإسود
شايف أمى
تعدل طرحتها وبتضحك
ف يزول همى
تفضل فى الصوره ببروازها
ويا إزازها
ترحل والذكرى المأسوره
عايشه فى دمى
فى صورنا الأبيض والإسود
شايف أحزان
وف صورة أبويا وملامحها
معنى الإنسان
إنسان بيكافح طول عمره
وعلينا يا ناس ضيع عمره
كان كله حنان
ف صورنا الأبيض والإسود
بنشوف حكايات
كام واحد عايش جوانا
وبقولوا دا مات
والسيره يا ناس هى الباقيه
رغم المسافات
ف صورنا الأبيض والإسود
أشخاص بملامح طبيعيه
من غير أقنعه ولا سخريه
ولا مكر معشش جوا قلوب
بيعيشوا معنى الحريه
ف صورنا الأبيض والإسود
الجار للجار
والطبخه يا ناس كات تتوزع
على خمسين دار
والناس تتجمع فى الفرحه
وتجامل بعض
حتى فى احزانهم بيعزوا
ومفيش أعذار
ف صورنا الأبيض والإسود
كان فيه إعجاز
ياما نفسى أدخلها وأدارى
جوا البرواز
أرجع لزمانهم يخدونى
أبقى معاهم
أشعر بالفرحه وياهم
ويقولوا دا فاز
ف صورنا الأبيض والإسود
كلمات احمد شاهين
ليست هناك تعليقات:
إرسال تعليق