#ماتزعليش
ماتخافيش وماتزعليش
أخوكى لساه بيعيش
ومادمت لسه عايش
فأى سهم طايش
مايمسّكيش
أنا لسه أمان وحمايه وسند
وعشان ضفرك ياغاليه
ممكن اهد بلد
وأخلى أشجع اسد
يندم انه إتولد
خلى ضحكاتك تعطر الكون
وأوعى يوم دمع عينك يخون
دمعك لما ينزل بصير مجنون
أشق الحجر نصين
وأشق النص نص تالت
وأقطع عشانك
كل الفروع اللى مالت
فماتزعليش
اللى كان بينى وبينك
لحظة زعل زالت
ورجعت أنا أمانك
ومهما العدا قالت
مايفرقوش بين القمر وسماه
ولا يفرّغوش النور اللى جواه
يابدر ف سما الكون ناير
نادى على أخوك يجيك طاير
لو كان ما بينه وبينك بلاد
إنت ساكن فى الفؤاد
ومستحيل يطول البعاد
وحتى وانا فى غاية العناد
الروح والعين محاوطاك
والقلب جيش واقف معاك
واليد سيف فى قبضة يداك
وأعتبره مااتولدش
اللى بيحاول ازاك
واللى بيطعن من وراك
أقسم بالذى سواك
وخلى القمر يغير من ضياك
عشانك يصير الغالى رخيص
وتهون الروح عشان تفداك
#شحاته_على_ابودرب
ليست هناك تعليقات:
إرسال تعليق