الكاتب المبدع م/محمد بدوى أبوالعلا يكتب الغيطان

الغيطان
************
اهلا يا فندى
بتعمل ايه وسط الغيطان
قلت اعدى
وافتكر أيام زمان
لما كنت اقعد لوحدى
وقت العصارى اختآر مكان

ويكون الوقت لسه بدرى
أذاكر دروسى بعد الاذان
فى العصارى والود ودى
أفضل مكانى فى الغيطان
بيبقى فيها الجو هادى
ويساعدنى ع النسيان

وبحس ان موجود ف وادى
نسايمه تغير الوجدان
ولما يصادف فيها ميعادى
مع المزارعين والجيران
كانوا يحترموا وجودى
ويعملوا شاى ع الدخان

كنت بشوف الدنيا وردى
وبسرعة البرق يمر الزمان
وكان اليوم منى يعدى
ويجى الضلام يغطى المكان
وامسك أوراقى بيدى
وأمشى واودع الغيطان

وارجع واعدى ع السواقى
فى المغربية وقت الاذان
لما بتروى الأرض الشراقى
والميه تأخدها بالأحضان
وتنسى اشواق التلاقي
والجمر اللى موجود ف البركان

وكنت بقعد ع الأنايه
ارمى همومى والاحزان
فى منظر الميه اللى جايه
مرسومه لوحه بالالوان
وف الطبيعه ريشة البدايه
أرض ومسقه وشجر نشفان

وجنب السواقى اشجار نخيل
طالعه بشوشتها للعنان
وتحت منها كاسى النجيل
وكان بعدها ورد وريحان
ونسيم هواها يشفى العليل
ومهما يعدى بينا الزمان

هايسيب وراه لينا دليل
علامه ورايه لزمان عنوان
وذكرى تبقلنا سبيل
لعمر عدى منا وكان

م/محمد بدوى أبوالعلا