عندي أربع بنات
أحلى و أرق زهرات
فل – ورد – رياحين
فواحات
ـــــــــــــــــــــــــــــــــ
لما اتولدت أولى البنات
أول نبته م الزهرات
جريت ، طرت ، لفيت
طالت النظرات
ــــــــــــــــــــــــــــــ
راقبت نموها يوم بعد يوم
و انا عايم في حبها عوم
لو نامت ، أجري ، أصحيها
أقلقها ، أخدها م النوم
أحضنها ، أحطها ،
جوه العيون
و أخاف عليها أغطيها
بالجفون
ـــــــــــــــــــــــــــــ
و كانت بتكبر و تكبر
و انا ادعى ربى اكتر و اكتر
إن عمرها يطول و يزهر
ــــــــــــــــــــــــــــــــــــــــــــــ
و لما بدأت تحبِى
اتحرك معاها قلبي
واما تضحك في وشي
ينور على طول عشي
ـــــــــــــــــــــــــــــــــــــــــــــ
و لما نطقت كلمة بابا
الدنيا رقصت ع الربابه
و قلبى طار م الصبابه
و قعدت أقول وياها بابا
بابا بابا
ــــــــــــــــــــــــــــــــ
كان بسعدني حنانها
و يعجبني لعبها جريها
جنونها
كنت دايما بدعيلها
إن ربى يخليها و يسعدها
ـــــــــــــــــــــــــــــــــــ
عشت طفولتي معاها
أجري والعب وياها
يا سعدى بفرحها و هناها
ــــــــــــــــــــــــــــــــــــ
كبرت شويه بشويه
و راحت الحضانه مش الكليه
و تيجي تحكي حكاوي مسليه
عن الأبله ، عن الألعاب ، عن
الأصحاب ، عن المربيه
ـــــــــــــــــــــــــــــــــــــــــــــ
كنت بشتري ليها اللعب
وتسهر وما يغلبها تعب
وتزودها بشوية شغب
شغب جميل مُحلى بالأدب
ـــــــــــــــــــــــــــــــــــــــــــ
و دَخلتِ الابتدائيه
يا أول فرحة ليه
و بعدها الإعداديه
كبرتِ قدام عنيه
و نجحت في الثانويه
ـــــــــــــــــــــــــــــــــــــــ
و كبرت شويه بشويه
و بقت أحلى صبيه
مجتهده و حلوه و قويه
ــــــــــــــــــــــــــــــــ
و دخلت بعدها الجامعه
و بقت نجمه لامعه
و نجحت فيها بجداره
و هنتها بكل حراره
ـــــــــــــــــــــــــــــــــــ
و دعيت ربى الرحمن
يوفقها في الحياه كمان
وأشوفها مع أحلى العرسان
ــــــــــــــــــــــــــــــــــــــــ
بقلم الشاعر // أسامة الحكيم - مصر
