( كله في الآخر هيرحل ) :
لما تبقى وانت حي
مش عارف ايه اللي جى
لما تجهل هل يا بكره ؟
انت ميت ولا حي
يبقى امرك كله راجع
للي فوق العرش حي
يعني شيل عنك همومك
وارمي عن قلبك حمولك
في اله هو اللي حارسك
مهما كان عرضك وطولك
اوعى تنسى يوم حسابك
او عقابك او ثوابك
اوعى تنسى ف يوم حقيقتك
ولا تتغر بشبابك
كله فاني كله زايل
اللي معدول واللي مايل
كل واحد له حسابه
كل واحد شيلته شايل
عيش سنة او عيش الوف
لف في الدنيا وشوف
راح تلاقي الكل راحل
كل من في الكون ضيوف
يبقى ليه نظلم في روحنا ؟
ليه نزود من جروحنا ؟
كله في الآخر هيرحل
مهما جينا ولا رحنا
يبقى هو حل واحد
اوعى تبقى عبد جاحد
اوعى تنسى ف يوم الهك
صلي واعبد رب واحد
بقلمي الشاعر جمال زكي عينر
ليست هناك تعليقات:
إرسال تعليق